რიტუალები

გაქვთ ცხოვრებისეული რიტუალები?

მე კი...

მაქვს ხანდახან ასეთი დღეები, როდესაც მინდა ყველაფერი განზომილად, დალაგებულად და გაწონასწორებულად მიდოდეს. მაგალითად როგორც ამ შაბათს.

დილით 9 საათზე გავიღვიძე, ავდექი და ჩემს საყვარელ საუზმეს ჩავუჯექი – ერბო კვერცხი, ახალგამომცხვარი პური, ლორი, ფორთოხლის წვენი, თაფლის სიმინდის ბურბუშელა და რძე.

10 საათზე იოგა მქონდა. დილით წვიმდა, მაგრამ სიზარმაცე დავძლიე და გავუდექი გზას. არ ვინანე, კარგი იყო.

იოგიდან გამოსული წავედი market-ზე. შაბათ დღეს მდინარის ორივე მხარეს გაშენებულია სავაჭრო კარვები და იყიდება უამრავი გემრიელი რამ, ახალ ხილ-ბოსტნეულთან ერთად. ამასობაში ამინდიც გამოსწორდა, გამოანათა მზემ. შევიძინე კვირის სანოვაგე და გავეშურე სახლისკენ.

სახლში მისული ოთახის დალაგებას შევუდექი. აიპოოდით ყურებში ჯერ მეთოდურად გადავწმინდე მტვერი, შემდეგ მოვატარე იატაკს მტვერსასრუტი, სველი ტილოც გადავუსვი ამ ყველაფერს ზემოდან და მივალაგე ჩემი სამუშაო მაგიდა.

ამ საქმეს რომ მოვრჩი, მზარეულობაზე გადავედი. დღეს სტუმრად მეგობარს ველოდებოდი, რომელსაც კარგა ხანია “სახლის” კერძები არ მიურთმევია, ამიტომ გავაკეთე საკმაოდ პროზაული, მაგრამ გემრიელი წითელი ლობიო და კატლეტი.

ამასაც რომ მოვრჩი, შევედი აბაზანაში, მივიღე ხანგრძლივი ცხელი შხაპი, გავიკეთე ფრჩხილები, გავიშრე თმა, დავიდე მაკიაჟი...

და უკვე 5 საათი იყო როდესაც სატელეფონო ზარმა მაუწყა, ჩემი მეგობარი სახლის კარებთან იდგა...

და ასე, უცებ დამთავრდა ჩემი შაბათის სარიტუალო ნაწილი და დაიწყო სპონტანურობა...